SVP-Einwanderungsinitiative

Dr Mörgel und dr Köppeli, die faare gärn ins Schwoobeland,
Mit fyysem Charme und krasse These hänn si Talkshows in dr Hand.
Es heig zvyyl Menschen in dr Schwyz, das miess men ändere mit Bedacht,
Wenn die zwai dääne blyybte, wär emol en Aafang gmacht.
(Die Aabrennte)

In dr Schwyz wird nim ygwanderet -
trotz alle ärnschte Mahner.
Mir wänn jetz kaini Fremde meh, scho gar nit Afrikaner!
Und wenn Europa das nit basst, ka uns das nit bewege -
Mir nämme schliesslig jederzyt no schwarzes Gält entgege!
(Schwoobekäfer)

Es brucht fir s Stoppe vo der Fluet an Immigrante nyt,
wenn d Masse wotsch begränze, got das ohni Plebiszyt!
By uns wird so ne Massnahm als Verkehrsregime verkindet,
will jeede Schwoob deheime blybt, wenn är kei Parkplatz findet!
(Bebbi Zigge)

Schweizer Luftwaffe

"Bienvenue uf unserer Hotline, bienvenuto und hallo,
Es sinn grad alli Mitarbeiter bsetzt, sunscht hätti ain abgnoo.
Iire Aaruef isch uns wichtig, well mir schetze Sii als Kund,
Drum duurt die Warteschlaufe aktuell au numme sibzää Stund.
Hänn Si e Froog zue unsre Dienscht, e Sonderwunsch oder e Klaag,
Dnn drugge Si jetzt Null-Acht-Fuffzää-gschweifti-Klammere-Gartehaag.
Sinn Si no doo? Nur so als Tipp, blyybe Si nümm länger draa.
Jetzt kunnt dr harti Warteschlaife-Sound vom Richard Claydermaa.
Lägg sinn Si hartnäggig, jetzt eerlig, es isch wirgglig niemerds doo.
Wenns ums Verregge syy muess, könne Si e Noochricht hinterloo.
Mir lütten Iine vilicht zrugg - so morn am nüüni ungefähr.
Liebi Griess no: d Luftwaffe vom Schwyer Militär."
(Die Aabrennte)

NSA-Spionageskandal

E Spitzel us Amerika
zapft e Natelnummere aa.
Är loost zwai Minute zue, und bevor är merggt was laufft,
het er e Versicherig und e Handyabo kaufft.
(Peperoni)

Alexander Tschäppät

D Mamme sait zu iirem Glaine: "Lueg dä schwarzi Maa!
Dämm derf me joo nit Nääger saage - sunscht kunnt me gruusig draa!
Au wenn s dy komisch dunggt, saag joo nie Zircher syge Affe
Und Italiäner - mergg dr daas - sinn gross und dien gärn schaffe!
(Dr Warmduscher)

Alice Schwarzer

D Alice Schwarzer kämpft mit harte Bandage
Bringt mängge Maa total in Rage
Hett villi Kämpf für d Fraue gha
Aber in Sache Gäld isch sy au nur e Maa
(D Clochard)

Zürcher Polizeiskandal

Ziiri duet in Gaunerkrais
no rächt wyt oobe stoo.
S git e Huffe z hoole und me kunnt
no lyycht dervoo.
Denn rieft emool deert aine d Schugger,
bruuche die als Stunde.
S segglet sich halt nit so schnäll mit de Hoose dunde.
(d Syydiane)

Miley Cyrus

D Miley Cyrus sigg bim Doggter gsi am Griine,
sie griegi Zunge nur no uuse, nimmi iine.
„Mach sBescht druss, los, i ha e Job fir di, e scheene!“,
Jetzt schafft si uff dr Poscht als Märggli-Schlägg-Maschine.
(d Biezer)

Francois Hollande

Die Herre Sarkozy und Hollande sinn zwai giggerigi Zwärge
In dr Bolytigg vrsetze si drgege kaini Bärge
Si wandere vo Rogg zue Rogg und dien sich verlustiere
Mit Bluetarmuet im Hirni loot sich’s ebbe schlächt regiere
Mit däm Brofyyl, do hätte si – und das ganz ooni Häxerei
Karrierechance bi dr Zyrcher Sittepolizei.
(die Gsalzene)

FIFA

Wägge de Sklave in Katarrh mälde mir Bedänggen aa
«Hännd Kai Angst» sait d Fifa «mir schaffe draa»
Per Vertrag het sich Katarrh jetzt mit dr FIFA gainigt
«Jedes Brobleem wird verfolgt und ainzeln gesteinigt».
(die Haiggle)

(sda/gku)

 

Anzeige